Kea 'a 'sʋ 'ʋn mɛ 'ɩn ‑te 'tɩɩn
62
Dafi 'a 'dʋ blei klaa" Yedutumʋ ‑a poɛ ‑jeo.
2 'De Kea 'a 'sʋ 'ʋn mɔ 'ɩn ‑te 'tɩɩn,
'ma 'pʋʋa' 'wlʋɛ 'de ɛ 'ʋn.
3 Kɩɩn, ɛmɛ ‑nɩ 'ma ‑kliosou",
ɛmɛ ‑nɩ 'ma 'pʋʋa' 'ma "jru 'wlaa 'ɩn ‑cɛɛn'‑, 'ma nabʋ se 'kɔ i.
4 Ao bee o ao 'wla nyɔ due' "jru i,
Ao ‑pɔn ɔɔ' blua' i ka nyɔ ɔ 'wlaa blo' ‑peea' see nɩa,
ka nyɔ ɔ 'wla ‑klɛɛ ɛ, blaa nɔ" ‑mɛ 'je ‑kwɛɛ?
5 Aoa pooɛ ɔɔ' "jru ‑sɔn ja ‑tɩ,
‑wɛe sɩ dia' nɩ 'de ao 'wɔn aoa' wɔn ɔ poɔ "diwan‑
'de aoa' pɛe a bla taso‑ ‑Te' ‑kwlʋ.
6 'De Kea 'a 'sʋ 'ʋn mɔ 'ɩn ‑te 'tɩɩn.
Ɛmɛ due' koun ‑a ‑te' 'ʋn pɛe 'di i
7 Ɛmɛ ‑nɩ 'ma ‑kliosou",
Ɛmɛ ‑nɩ 'ma 'pʋʋ i‑ ɛmɛ ‑bo 'ɩn nɩ 'e 'ʋn ‑wɛe 'maa ‑see'‑
8 'Ma 'pʋʋa' ke 'ma ‑cian"‑ ‑wee'‑ nɩɛ 'e Kea 'kwa,
'ma ‑kliosou", 'ma 'kpɩ, 'ma ifuoi‑, ɩmɩ ‑nɩ Kea.
9 Ao 'ma 'cɛ, ao ‑te' Kea ‑kwlɩ" jeejee,
ao 'tmʋ ɛ dɛ ‑nɩa 'de ao pɛe o ɛ
Kea mɛ ‑nɩ ‑aa sro' 'wlaa na'. ‑Te' ‑kwlʋ.
10 Kɩɩn, nyiɔ nɩɛ feɛ'‑o, ɛɛ ‑si';
nyiɔ ‑pʋ nɩɛ 'flefle 'de Kea "jri 'de,
ʋʋ se dɛwɔn nɩ.
11 Ao 'bo dɩ ao ‑sa nyʋ 'kwai "klaan‑ "klan 'dei 'pɩɩɛn.
‑Bo ɩ "jii ao "wliiɛ ‑mɛ wɔn 'de ɛ, ɩ 'bo aoa' pɛe ‑criɛ'.
12 Kea 'tmʋɛ dɛ kpɛ due', kpɛ 'sɔɔn,
ɛmɛ 'ɩn 'wɔn ɛ 'naa; ɛmɛ Kea, ɛmɛ 'kpɩ nɩ 'e 'ʋn
13 Nyʋ 'Blei‑, ɛmɛ nmɔ 'diwɔn ‑ke dɛ ‑nʋɛ,
ka nyɔ 'ɔ nʋʋdɩ nɩa 'kamɔ ɛɛ ‑sɔ ɛɛ' ‑kei".